01.04.2025 - AKTIVITET TRAJNUES: “Kompetencat e gjyqtarit të seancës paraprake, roli i tij në procesin penal. Kufiri lidhur me vlerësimin dhe çmuarjen e provave”

Shkolla e Magjistraturës, më datë 1 prill 2025, zhvilloi aktivitetin trajnues me temë: “Kompetencat e gjyqtarit të seancës paraprake, roli i tij në procesin penal. Kufiri lidhur me vlerësimin dhe çmuarjen e provave. Mundësitë e vendimmarrjeve të gjyqtarit të seancës paraprake. Problematikat në praktikë lidhur me disponimin për plotësimin e hetimeve, përllogaritjen e afateve të paraburgimit në rastin e disponimit për plotësimin e hetimeve, pushimin e çështjes, ndryshimin e akuzës. Ndarja e çështjes ne gjykimin në seancë paraprake dhe parashikimi ligjor lidhur me detyrimin e shqyrtimit të çështjeve të ndara nga i njëjti gjyqtar i kësaj seance. Zbatimi i rasteve të papajtueshmërisë”, pranë ambienteve të Shkollës së Magjistraturës, në Tiranë.

Ky aktivitet u drejtua nga: 

Ekspert: Sokol Binaj

Lehtësues: Gëzim Spahiu

Qëllimi i këtij trajnimi është: rritja e njohurive mbi seancën paraprake, si institut i ri në sistemin tonë procedural penal. Analizë dhe trajtim i thelluar i rolit dhe kompetencave të gjyqtarit të seancës paraprake, si dhe i vendimmarrjeve të tij. Njohja me problematikën dhe praktikën gjyqësore lidhur me seancën paraprake, diskutimi mbi raste praktike dhe vështrimi krahasues i tyre me sistemin procedural penal italian dhe praktikën e Gjykatës së Kasacionit në Itali.

Trajnimi u realizua duke ndërthurur prezantimet (deri në 20-30 min) me diskutimin e çështjeve të shtruara (pyetjeve vetë studimore; pyetje-përgjigje) dhe ushtrimeve me raste praktike, për të nxitur dhe realizuar ndërveprimin aktiv të pjesëmarrësve. 

Gjatë këtij aktiviteti trajnues u trajtuan tema të ndryshme, si: 

• Kompetencat e gjyqtarit të seancës paraprake, roli i tij në procesin penal. 
• Kufiri (në raport me gjykimin e çështjes në themel) lidhur me vlerësimin dhe çmuarjen e provave – standardi provues i adoptueshëm në këtë fazë interlokutore të kalimit nga faza (e procedimit) e hetimeve paraprake në fazën e gjykimit të akuzës (procesit). 
• Mundësitë e vendimmarrjeve të gjyqtarit të seancës paraprake. 
• Problematikat në praktikë lidhur me disponimin për plotësimin e hetimeve, përllogaritjen e afateve të paraburgimit në rastin e disponimit për plotësimin e hetimeve, pushimin e çështjes, ndryshimin e akuzës. 
• Ndarja e çështjes në gjykimin në seancë paraprake dhe parashikimi ligjor lidhur me detyrimin e shqyrtimit të çështjeve të ndara nga i njëjti gjyqtar i seancës paraprake.
• Zbatimi i rasteve të papajtueshmërisë.

Në këtë aktivitet trajnues morën pjesë gjyqtarë, prokurorë dhe oficerë të policisë gjyqësore të Republikës së Shqipërisë.